القناعة كنز لا يفنى

الإنسان ضعيف ، كي نتفرج في الفقر و الناس لي تعاني ، مرات نحزن ، مرات نبكي ، مرات نلوم عالدولة و على الناس و نوصل حتى نلوم على روحي ، ديما نقول كان جيت لباس عليا راني نعاون في الناس ، لكن مانعرفش كيفاش نجم نولي في الوقت هذاكا ، يقولو الفلوس تغيير النوايا و تعمي النفوس ، الحقيقة أنا فقير ، ما عنديش حاجة مميزة في حياتي ، عادي سروال يتمسخ نعدي نهار كامل ما نخرجش للي يشيح ، البنات ، ممكن قلبي باهي و حنين و خشمي ما نهبطوش و ما عنديش حاجة تجبدهم و عايش وحدي ، الحمد ليك يا ربي لواحد عايش خير من الناس و أقل من الناس ، مرة عندي و مرة ما عنديش لكن عمري ما قلت عاوني و لا سلفني و لا اعطيني ، نشم صوابع يديا نشبع ، طموحي ماهاش لا نولي مليونير و لا حتى نكسب كرهبة أو دار، يقولو القناعة كنز لا يفنى و أنا راضي باللي عطاهولي ربي

هذا نداء الى كل واحد ما عندوش و نهار لكل ماد يديه في التلافز ، علمو ولادكم على القناعة و الشبع و ما تعلموهمش على الجوع ، قولولهم لي ربي يحبنا لأنو بلانا بالفقر و مابلاناش بالفلوس بش يختبرنا ، بربي يا إذاعات و يا تلافز يزيونا من التجارة بمشاعر الفقراء ، عيب عليكم تعاونو انسان ببلازما تعملو معاه البوم تصاور ، عيب عليك يا جعفر الڨاسمي تشد طفلة صغيرة تسأل فيها على فقرها للي تبكيها ، عيب عليك تقول إنك تسعى الى مساعدة الناس و إنتي مخصص نص ساعة من كل حلقة تحكيلنا على نسب المشاهدة ، صدقوني نبكي كي نشوف تلفزة وطنية تقدم في المساعدات للفقراء فقط بش تصورهم يتعاركو و عزايز فوق الثمانين في عوض ما يعبدو في ربي و يبجلو بعضهم عرك و معروك على خاطر جراية

يا خويا خلّيني فقير ، نعيش راجل و بقدري و لا عبد للفلوس تجري بين يديّا و نقعد في دعاء الناس و دعاء الوالدين

نعيش فقير و ينعل بوووو الرخس و لا لي يجي يسبك بفلوسو و يرخصك على خاطر زبل الدنيا

تي نعل بوووو كل من باع روحو بالرخيس للعبد الرخيس على جــــال المال

القناعة ما تتشراش بمال الدنيا ، الشهامة و الرجوولة أنت تصنعها بيديك و بتربيتك و بأصلك و بتقاليديك و بحمدك لــربي و برضاك على كل شيئ مكتووب عليك و ليك و قليل من الناس لي يفهمو معنى التكبر و ما ذاقوش الرخس و الذل و الرذيلة

.

اللهمّ اغننا بحلالك عن حرامك إنّك أنت الغنيّ و نحن الفقراء