تخيلو العالم الكل بلاد وحدة

تخيلو العالم الكل بلاد وحدة و العالم الكل عايش لباس من غير حروب و من غير راسيزم ، مسلمين يهود مسيحيين لا ديينيين ملحدين بيض كحالش قمحيين هنود عرب غرب صينيين ،لكلنا نعيشو في حومة وحدة ، تخيلو الناس الكل تصبح على بعضها ، الناس لكل ديما تضحك ، الناس لكل نحبو بعضنا ، تخيلو ربي صنع الاديان فقط بش يختبر انسانيتنا !! تخيلو مفماش حدود و مفماش لا صور بين امريكا و المكسيك و لا صور بين تونس و ليبيا ، ارضنا غنية و واسعة و نجمو نعيشو فيها العالم الكل لباس و كل واحد مهما كان دينو او تفكيرو من حقو بش يعيش حياة حرة و كيما يحبها هو ، هذا لازم يكون قانونا و لازم نعرفو لي الانسانية اهم من الاديان و الكافر هو اللي ما عندوش قلب ، الكافر هو اللي قلبو مليان بالحسد ، الكافر هو اللي يعدي حياتو يكره و يبغض في الناس ، الكافر هو اللي يقتل ببرودة دم !!
لازم كل بلاد في كل نقطة في العالم تحاول تبني جيل جديد مش كيف جيلنا و الجيل لي قبلنا لازم نعلمو صغارنا كيفاش يحبو غيرهم كيفاش يحنو على بعضهم لازم نعلموهم لي لونو اسود عمرو ما كان عبيد ، لي عينيه زرق و جاي من الغرب عمرو ما كان عنصري و العربي عمرو ما كان ارهابي ، الناس تفرق على بعضها والخير والشر في كل بلاصة، لازم نقريوهم مادة و نسميوها الانسانية خاطر ما نتصورش فما تربية اسلامية من غير انسانية !خليونا نكافحو، خليونا نحاولو نبنيو جيل و عالم جديد من غير كره ، من غير قتل من غير حروب منغير سفك دماء ، خليونا نحبو بعضنا ، خليونا نهدمو لحدود و الحواجز العرقية ، خليونا نتخلصو من البغض و الشتم و الحسد و التمييز العنصري ، خليونا نبني عالم الحب ، عالم حب لغيرك ما تحبه لنفسك !!
خليونا نتحدو الناس لكل !!