بين البنين

بين البنين
لا موتى لا حيين
بالحق عايشين
لا فرحنا لا خذينا حق لا ثنين

ببن البينين
احنا الي نقومو بكري نهار لثنين
احنا الي الكياران و الترانات بينا معبين
احنا الي قدام لمعامل وجوهنا عالخدمة ماديين
احنا إي احنا
ماناش لخرين

بين البينين
و ساعات جملة ماناش هنا
موش موجودين
ميكروسكوبيك تي ما نتراوش بالعين
براينية موش م السكان الأصليين
ضياف ودرجة ثنين
احنا الي نهارك يسوى الفين
دخانك دزيري و pine

بين البينين
لا توانسة لا تونسيين
لا حق لا عليك متكلمين
لا خذينا لا رات عين
احنا الي ما ناش يساريين لانا علمانيين لا اسلاميين
احنا سيقارو في ثنين
احنا لحومة و السهرية في حنة ولد عم حسين
احنا الي لانا لفوق ولا خلطنا ع المتوسطين
احنا حرقة في شقف و دمعة لعزوزة عالعيين
احنا خبزة و طابع جبن وعرف يعشق طحين
احنا لكار و التران و المشي للي تهرات الساقين
احنا الي في بلادكم تعدية متعدين
نعيشو خلسة ومتخبين

بين البنين
احنا في بلاد البرشة طحين