موضوع و نتمنى الناس لكل تشارك بكلمة

تهبط للعاصمة الناس لكل تلبس مليح تقشش تريق تهون على رواحها من زارا لبرشكة و غالكسي و آيفون و ميريت و في جيوبهم 200 فرنك و تلقاه بوه انسان مزمر ما عندوش و مرهون

في الجنوب تلقاه يخدم في الكونترا و عندو 7 مليارات في البانكا و نهار الكل البانكا تلحلح و تبشبش بيه بش ما يجبدش فلوسو و هو يسوق في بسكلات و نهار لكل يترشف في التاي تحت الزيتونة

في الساحل تلقاه في شلاكة أديداس 3 بوند يترشف في فيلتر و يتكيف في البين و هو مولى 6 عمارات و زوز تكسيات.. يتكيف في الكرالا و هو مدير !! ..

في صفاقس تلقاه على دراجة هوائية يسري من الفجر و هو مولى زوز معامل و يبني في الثالث..

في المناطق الداخلية تلقى عندهم أرض 7000 هكتار و هابطين للولايات الكبرى يخدمو في معامل على جرد 400 دينار .. 

علاش زعمة القراوة مكروهين في سوسة المنستير كان ما جاش فاهم برشة يفسدو و يتجلطمو و نهار الكل يشريو في المشاكل !! باهي علاش رجال الجنوب محبوبين في العاصمة رغم لي الجلامة مكروهين كان مش من مشاكلهم و تجلطيمهم عالناس !! علاش عرفي الجندوبي نهار لكل يذل في ولد بلادو لي هو زميلي و انا البراني يحبني و يسايسني رغم لي انا ابخل منو و جالغ اكثر منو !!

كان تمشي للبحر في المستير الناس لي يعومو فيه مش مساترية و تشوف الكوشات و الوسخ و قشور البطيخ و الدلاع في كل بلاصة و كي تهبط لسوسة و تشوف مكثرية الناس لي تبراكي و تشري في المشاكل و تتجلطم ماهمش سواحلية تو تفهم لي كلامي

صحيح ما لزمش ارنب تكر على حلوف اما علاش ديارنا نضفوها و ديار الناس نبولو فيها !! 

بش نكونو متفاهمين راني نقدر الناس الكل و براسك مخالط ناس من تونس الكل و اللي يحكي معايا كلمتين يحبني خاترني نقدر

كيفاش بش نجمو نحبو بعضنا و نحنا مخاخنا واقفة و ما نقدرو حد و في عوض ما كي نمشيو ضياف نخليو الناس تحبنا نتصوقتو و نخليو الناس تكرهنا !!

علاش ما نربيوش رواحنا !!